ارويعي الفاخري يا العين هيا شوره

يا العين هيا شوره
مشكاي قالك يا العين هيا شوره العقل حاس واختلطن عليه اموره..

يا العين ريد انعدّي العقل قالك غاية مناي وودّي
متضايق ملاجي نين واصل حدي ما هناك وين الريح تاخذ دوره
ما هناك شي حاجه السر تْهدّي قول خاطري ها الوقت فيت نظوره
نجيه من خبر واجد ونا متكدّي وثقل الجضر لاصق عليّ بزوره
يْخف وين ما يده تْجي في يدّي ويْجلّي غشاواتي بفوح عطوره
ولساني الشاعث في اللهاه يْندّي وحلو الخبر يسهل عليه مروره
وبين ديه نضحك ضحكتي من جدّي وعنده جرب كبدي تطيح قشوره
في عينه الريح معاي والاّ ضدي نقراهن قرا برّاج في بلوره
ويا العين لاعد م الطريق تْردي ما هن سوا رقو الجبل وحدوره

يا العين كيف الدوّه اللي ما مشيتي قاعدة لا توا
عندي العقل مدكمس وحايس جوه واسق سماه وضايقات بحوره
متحيّن علي بارق يفقس نوّه يْخلّي هوادين البراقي عوره
أخذيه نين كنيبه بها يتروى شوفة اللي حالق عليه خطوره
حتى من بعيد لبوجبين اضّوّى يسد النظر للطير كيف نقوره
قدّامك علي نار الغلا يطّوّى وليل ونهار مْسمّرك بسموره
يروف نين من حاله عليه عدوّه اللي كل ساعة كاثرات شروره
وربيع الرجا يا ريت ياخذ سوه علي ما جرى له ما طرب لخضوره

يا العين راحي بينا وخفي علي لولاف لا تبطينا
ما هناك شي عاقل يلوم علينا ان قلنا الجولة ع العزاز ضرورة
كلام العرب بلحيل ما يعنينا تعتم يقول لها العين فجوره
نواروا اللوعة ما نهار نوينا قوية تفنّص عينها مقرورة
سوا عاد زينة كان والاّ شينة ترفرف علي حبل العلل منشورة
ما يقول وين اللي الشمس بعينه وزومة الرعد في الغيم مي مستورة
حتى والزمان ديار نازل فينا وعنده دمانا في الغلا مهدورة
الا نا وهي ع الصوب ما وانينا العين فيه بالضلعة تجي مجرورة
وهي كل يوم تقول يا ناسينا وكل دار فيها طالقة ثغبورى

يا العين علمي ضايق ودوج العرب يالاي ماني طايق
يقولك اللي مو من حساب عتايق ليام ع العدام مْجبّرات كسوره
وْحل في الزمان ودين ها الخلايق اللي كل ساعة جايين بصورة
صغار النفوس اللي خياهم تايق ما يطعموا مسكين يوم عشورا
ان قالوا كلام يْزيّفوا الحقايق واصواتهم علي درب الظلال جهورة
واللي تمتسك منهم عليه سرايق فيهم ترفرف رايته منصورة
وهو دوم ع النهبة زناده سايق وما تفت منه غفل لا معقورة
والطيب يلاقي في الطريق عوايق منهم و ديما زلته منظورة
إن قصّر لْسنّتّم عليه طلايق ولا ان دار زينة عندهم مذكورة
وقول الحقيقة تم موعد لايق منّه عرب كيف الصيود نفورة
عندي العقل يدوي ما لوالي فايق وان طوّل اسماه اللي خرج عن طوره
وبالك الا لا خير في اللي رايق بلا نار حمرا ما تفوح بخوره

يا العين شور الغالي خْذِي العقل كنيبه أسع يصفى لي
علي شان كثرة ها الدروب قبالي يغيّب عليّ ونا نريد حضوره
بقيت لطرا ليّام كي التسالي بينهن تقول يطاوحن في كورة
ونا قبل كنت يكيد روز اثقالي فيهن وديما صابتي موفورة
ولا يْغرَ بي فيهن بكا القبالي وشيل السراب وطرشقة لمهوره
ولتوّا يوازي في الخبر غربالي كلامي قليل وسيتي محجورة
ولا نعيب في عمي ولا في خالي ولا صاحبي نجرح نهار شعوره
مغير ما قدرت اني نوسع بالي ان كبّرت السية فيّ مي مغفورة
ولا قدرت نشبه بالنخيل افعالي اللي بحيط لمحادف تطيح تموره
الا يا العين عزيز مو كي والي ومهما يدير نقول زينك دورة