ارويعي الفاخري عجب لوكان هناك عجيب

عجب لوكان هناك عجيب .. يبات غريب .. الداني بين ضحى ومغيب

عجب لو كان هناك ضمير.. وصحوة خير .. ومازال الّلي صـار يصير
وللخاطر قدر وتقدير .. شوى تحسيب .. انّه نص القاب تشرهـيب

عجب لو قلنا مو معقول .. ظلام ليول .. تمنّيناه ونوم يطول
ومي رادة نوم الا قول .. يجي كنّيب .. منـام يجيب زويل حبيب

عجب لو قلنا مو تسفيه .. براي وجيه .. الله سبحانـه متـولّيـه
علينا راد نعيشوا فيه .. زمان مريب .. ان مانك ذيب كلاك الذيب

عجب لو كان هناك عجاب .. ان درت حساب .. علي مو جاري في لصواب
هدفّهن خادع للضـرّاب .. ان جاه يخيب .. الصادف والخطّاي يصيب

عجب مو ساير من مكتوب .. كفاك ذنوب .. الغاثه يا طبّاب الصـوب
طروك تسمّي في مطلوب .. يكون طليب .. بدا ويكون لداي طبيب

عجب لو كان الدمع يفيد .. بكاي شديد .. علي غالي دنواه مكيد
قريّب كان بدار بعيد .. اليوم صعيب .. تباعد غـير الدار قريب

عجب لو قلنا ها الكلام .. هناك اسلام ...اسّاع يقولوا طيف احلام
اكتبست نين كسى الظلام .. وتاق لهيب .. النجمة قبل الشمس تغيب

عجايب والّلي صاير صار .. الا لقهار .. بلاهن ما طريوا لخيار
ولا الجاوي من غير النار .. يفوح بطيب .. مواعظ و الدنيا تجريب