ارويعي الفاخري فرحه عمر

فرحة عمر
طاحت شمس يا غالى غلاك وخيّم ليل من فرقاك شين
يوم سعيد يا مسعد مساك وفرحة عمر تمت بعد حين
ويا مْحلاه ضحكك يا بهاك عليك يخيل لبيض والثمين
ادّودش بث في الدينا ضياك وفاح بعطر ورد الياسمين
ها يا دار يا حالى معاك هدا وين ما صدّق البين
قاطع فيه عرقي من نداك وقالب فيه حالي مرفعين
يا اللى كنت نفرح فى زهاك كنّى اليوم في فرحك حزين
وكيف تكون هي ساعة هناك ساعة جرح في صدري مكين
ويش اليوم قالن لك ارياك وين لْقيت خاطيي قرين
واحد قبل رانى انت راك كنا كيف تمينا اثنين
وكيف زْعمة تحكى عن هواك لغيرى فيه ليل النايمين
بنطق لسان تهمس به شفاك والاّ بضحك عين المستكين
وكفك لان وارتخين عضاك وكان لغير كفي ما يلين
وكيف خْطاي لطٌن عن خْطاك ودربي وين ماشي وانت وين
سنين غلاي تعزقهن وراك كيف قْدرت تفني عزم زين
ووين تريد يا تابع هواك عليك نْخاف من غربة سنين
بمن ع الدهر عابي في عْباك ان صارت فيه تكشيرة جبين
يراعي فيك عينه من حداك وْيشدّ ذراع للنشلة متين
ويفهم فيه ما يجول بخفاك ويقرا فيه في لمحة العين
ووين تحوس يعرف ويش داك وفيك يغوص للسر الدفين
عْياط البين في الحلم بدناك قطع مشوار عمري قطعتين
مكبر نار من باقي رجاك نْنافخ فيه و يثوب العوين
ويش يريد يضويهن بلاك دروب الليل في الحال المهين
الحاصل كل مو ساير فْداك فْداك الجرح وفْداك الحنين
يا مشكاي لا تعكر صفاك وزيد اليوم في ضحكك رنين
ادّودش بس واسبح في افلاك احلام البشر وابهج واستزين
اضحك للورد ما بين الاشواك وارقص في قلوب العاشقين