ارويعي الفاخري نلقاني صريع الغلا

نلقاني صريع الغلا من اولها ونقول يا الخلاص خلص وحلها

نلقانه برقلي م العين بارق الشوق والعقل يقلي
وجت جصره العين في غيض عقلي واللي تجسر النيب هوجة فحلها

نلقاني المونس بريحه شظاه طلق في غرس تونس
ولفحة حرار شوق في وجه يونس ورا سوارها عبد جايب شكلها

نلقاني صدفتك وسامع عليك نين بالعين شفتك
عرفتك وحسيت نفسي عرفتك بلا معرفه سنين طايل اجلها

نلقانك عزيزة يا مدللة يا سفيرة عزيزة
انتي شمس في الكون نور وركيزة واللي يجهلك كل حاجه جهلها

نلقانك جميلة مْحودّه جميع الجمال وجليلة
كتفتي جميع من حظر بالجديلة السامه صويبعات جادل جدلها

نلقانك حكيتي علي قيس لوجاع في العقل جيتي
قذاذير لشواق هاكي وهيتي اللي لكل قذار لاخر قفلها

نلقانك غليتي بهرتي علي طول عيني مليتي
سحرتي علي طول عقلي خذيتي انورتي علي طول نفسي املها

نلقانك الدنيا وحدود المْنَى لكل طلاب منية
المنية صحيح فيك عنية وقنية ومنية اخرى ما تجي في بدلها

نلقانك مليقة وكدك اترج فيه خطوة رشيقة
ولفظك تذوب فيه بسمة رقيقة وخفة الدم زين عقلك عدلها

نلقانك وثيقة وكيفك نريد وين نلقى عشيقة
حقيقة ان كان تنشدي ع الحقيقة دقيقة معاك كي الدنيا وهلها

نلقانك تقدّي وصحيح الغلا نا لقيت فيك ندّي
نودّك بصافيه وانت تودّي صافيه وانتي ونا في قبلها

نلقاني نْخاير وحاير وما زلت في الراي حاير
وطاير ونا بين نازل وطاير وداير عزوم غير بين فشلها

نلقاني نكابر وصابر ومن قبل نا كنت صابر
وجابر الا ع العدم كل جابر جبّارته ان زال دوم حاسب زللها

نلقاني الحالم بعالم ونا جيت في غير عالم
مسالم وما جيت في يوم سالم وظالم بها جيت نفسي بولها

نلقاني مريب وقريب الا ننقدع من قريب
نغيّب ويا ريت نقدر نغيّب نسيّب ولو شْوَيّ منقض عللها

نلقانها قوية لوعتي وما بتت ساعة هنية
وشايطة النار فِيّ صبح وعشية ولمتى النار نا نريد نحملها