ارويعي الفاخري زول جميل

زول جميل يانا اليوم هاوي قاسي كنت خلاني ضعيف
شوف الريم خزرات النداوي من للعين من غيره وليف
ظاوي الوجه لو واراه ظاوي كيف الشمس في المزن الخفيف
دوره ماح في طوله يساوي كي الجريد في النّوّ العصيف
فوق النحر سلسلته تهاوي كاشف فوق مرمارة رصيف
ريق آلذّ من شرب القهاوي ريح آرقّ من نسمة الريف
يسحر في بسماح الحكاوي وبترديع لسلوب اللطيف
ناره فِيّ تطلق في شظاوي تشكع نين في عين الكفيف
انطاقش فيه ف اركان الخفاوي طقاش الريم للعشب الرهيف
ياخذ الليل فوق روس العلاوي ذيبه شين عَوّاي ونحيف
حن الله داواه المداوي وجاه اللطف من عند اللطيف
بغيث ارجاع موعاطي جهاوي يدخن بات لبروقه خطيف
ينفلتن فيه عازقات العذاوي زغراتات في النو الكثيف
نشابات في عوص الحناوي طلاعات للدرع الكتيف
طواحات ثقله ع الكداوي بين حيوط وتراب ولفيف
هذا شَيّ من جدوى حكاوي مبدى سرد مو كلّه طريف
عندي العقل يلوي فيه لاوي حزنه دوم للطربه رديف
فواهق غر من كل الجلاوي تغشم كل عرّاف وظريف
تْطَيّر نوم حلوات الغفاوي بكا بغداد والقدس الشريف
حشد مال ورجال وتقاوي قران الشر ع الدين الحنيف
نحنا غير تطبيل ودواوي عرض جيوش وخداع ولصيف
كيف الراي ما عندي فتاوي وكيف نْدير ما نعلام كيف
روحي روح نكارة شهاوي وراسي راس ما يقعد بْكيف
عقلي عقل يرقى لهن سماوي قسو الحرب والشوق العفيف
لا ني كيف لفاقة اللهاوي نظلل تحت من مزنة الصيف
لا ننغر بسماح الكساوي وعلو الجاه ومعيشة الهيف
ما من ملك خير منه رعاوي وما من حر خير منه وصيف
غير الحظ وين يكون شاوي كب اليد لنسان الحسيف
لا له قنو ضمار الصهاوي ولا له مال للزينة وظيف
تبدل فيه من خيبة السعاوي طراد المجد بطراد الرغيف
يلاوي بين القيود المطاوي قبل الَّليّ مرباعه يصيف
عليه يشوخ كم فالت رْباوي دوبه نح وتْكبّر وزيف
في سبّاه يرضى بالدناوي جمع المال وجهه مو كسيف
كي بندير نفاخة الجاوي ها للي دوم طايب ع الرجيف
كيفه قال كلني ع الشهاوي يروعك يوم تلقاني حليف
وهو باطلات في ايديه العزاوي لومباع لا يبقى مْصيف
مع العدوان يجاود بْجاوي ومع الصاحيب جبار وعسيف
يبقن خير تقصير الخطاوي مْفيت الصبر ما حاجة نْضيف
مْفَيت لله ما عندي شكاوي ومْفَيت الله ما نبّي نصيف