ارويعي الفاخري عشرين عام

عشرين عام ما تقول غايب دقيقة
بوشفة رقيقة
جاباته على وان غفلة طريقه
عشرين عام ما نندري نين غالي
لقيته قْبالي
وسلّم وقال كيف حاله وحالي
وعدَّى ونا خير ما عد جرى لي
انفاسي شريقة
ونقول ما جرى حلم والاّ حقيقة
عشرين عام يا خوي ما هن مودة
شبابي ترده
وهو لَوّلي زان مردوع قده
زاداته بها وحسن طولة المدة
وعدلة وليقة
بصورته اللي في خيالي وثيقة
الا مفيت يا دوب عطشان خده
وشاوي بريقة
وصوته لي فيه نبرة غميقة
عشرين عام يا خوي وينه وويني
حتى لو نسيني
ضليمة ان كان قلت رايح بديني
نهار قلت لا قسم بينه وبيني
معاه العليقة
انقطعت واللي هذا يمشي لتيقة
ما زالت ادّنقيرته قْبال عيني
وهوجة غريقه
وعقده لي سهو فرط عقيقه
عشرين عام يا خوي ضاعن احلامي
ان ترجع ايّامي
مقيوله غناكم الله عن كلامي
حكاية اللي فوق من شوق دامي
اطّرطش دقيقة
و يريد يجمعه يوم ريحه شليقه
عشرين عام من يوم خسن اوعادي
وفارق مرادي
ونا في تفاكير شَوَّن ارقادي
خلني عديم راي ديما افرادي
وعيني شفيقة
مستاحش ونا بين دوج الخليقة
عشرين عام ما ريت شي زول كيفه
حكمني بسيفه
ادّبني غلاه داب داب العسيفة
جناح طير بردان كاثر رجيفه
فواد خفيقه
ان قيل اسم جاء فيه حرف العشيقة
عشرين عام من يوم فصلة اوداعه
جرى النو ساعة
وبرد الغلا فيه صبه شعاعه
في عقلي صْداف عام شهرن ارجاعه
حرثه شقيقة
الموكي لها الوقت صابه غليقة
عشرين عام يا العين قيسك وليعة
سنين القطيعة
معاهن شفع فيه عندك شفيعه
والله زول جلوال مشيه رديعة
بخطوة رشيقة
غزال بين طيرات وادي زليقه
هيالي بعد محل .....
ويفراج ضيقه
لو يسقط على وطن عطشان ريقه
عشرين عام ما نندري نين جاني
حكى بالمعاني
وادع بلا عهد توديع ثاني
وما لي خبر حط في المواني
ومنهو رفيقه
وفي حضور والاّ بوادي فريقه
من يومها ونا بِيّ ضايق مكاني
وجوفي حريقة
وقاسمه لها الوقت راسي شقيقة