ارويعي الفاخري نجم اليل

نجم الليل
نجم اللِّيل يا ليلى ثقيـــل*** قصير الدرج في كبد الســما
لا لي لوم يعجل بالرحيــل*** ولا لـي لـوم تاتيني اخــرى
صايف فيك مرجاي الطـويل*** صيفة جـذر ما طال الثـرى
شلت الصوت في ذيل الرحيـل*** لك نـاديت ما جـاب النـدا
جيت نموج مكسور و ذليل*** صوتي ضاع في ريح الخـــلا
من فرقاك ودّرت السبيـل*** لك بردان كنتــي لي دفــا
لا عــد دل قافلتـي دليـل *** و لا عد شمس ضوّت لي وطــا
و لا فـي ليل نوّر لي فتيل*** و لا عد طير في وذني شــدا
سنين العمـر م الكرب الجليل*** ما اسرع كيف ما طارن هبــا
جفّـن كيف يابسة القصيـل*** منبهتات بهرجهن طفــــا
كاس الشوق خلاّني هزيـل*** نشرب فيه فـي صبح ومسـا
قبلك كنت في النوم العسيل*** كيف الطيـر سابح في الهــوا
نرقد وين ما يهجم اللِّيـل*** عندي كل ما يجري ســوا
جيتك جـيّ راكبني جفيل*** نلعب بين غيطـان العفــا
فجّرتيــه لحسـاس النبيـل*** قبلك كان عايش فـي خفـا
فيك لقيت لاحلامي رسيـل*** وردّيـات فـاح لهن شــذا
جيتي طيف في عمري دخيل*** ماسح كل ما قبله جـــرا
منّيـتيه بالفيض الجزيـل*** حلمــي نين في ظلك نمــا
و بين يديـك يا شبه الهميل*** صاف صياف بلكل وانتهــى
جيتك مزن باشر بالنزيل*** لاطشتيـه بارياحــاً اقسا
طاش انظرك و القيتي خليل*** غيري وين في شطّك رســا
غرّك ظل يا ليلـى ظليـل*** و امباهـاه و معيشة رخـــا
و اللِّي كان عندك مو قليل***طوّحتيه تطّويــحة نـوا
سيّبتيه من غدرك قتيل *** بين اللِّيل و اذيـاب الفــلا
يانا اليوم يانا اللِّيى عليـل*** عنّي غـاب جيّاب الـدوا
مـايج كيف عالية النخيل*** تصفق فـيّ لريـاح القــوا
وين نقـول نستعدل نميـل*** نردح كيف ميزان العصـى
راح البين بالحلم الجميـل*** قصوري فيه بنيّن ع الخيــا